Camunni
(dormenu, dormenu)
Duve su’ Pinu, Rafele, Micu
lu mastru, lu giometra, l’operaiu
cu ‘ntra li mani manicula, livello e picu
mu izanu nu capannu supa lu taju
Dormenu, dormenu supa a Camunni
E duve Teresa, Rini, Maria
cara la prima, ncamati li secundi
l’armaru de facigghiu mu pulizzanu la via
o mu appartanu de li tavuli li frundi
Dormenu, dormenu supa a Camunni
Duve su’ li tri capusquatra (de mangiare sempe vurdi)
chi predicaru: “ordine, lavoro e disciplina”
dassaru alli vacabundi mu si penzanu puru furbi
e s’incazzavanu s’erenu l’otto o l’otto e cincu la matina
Dormenu, dormenu supa a Camunni
E duve tutti chiji chi l’attrezze si scegghianu
carriola, ghaccetta o pala (zappa mai!)
ma erenu li primi chi mangiavanu e mbivianu
e pe’ na vota chi si sporzaru disseru: ”la schina, aiah, aih!”
Dormenu, dormenu supa a Camunni
E duve (no’ fazzu nome) chiju chi facia tuttu
chi fu scacciatu sutta l’inerzia generali
iju, chi dunau la facci allu vento, li vrazza alla fatiga e
davero poco penzero
alli dinari, all’amuri e allu celo
Iju, sì…mi pare ca ancora lu sento
ruppire mattumi, mpastare cimento
pare ca lu sento gridare ancora ntra lu vosco, russu e ncazzatu
“No’ capisciti nente! stu muru vole cchiù izatu!”
N'omo de puzzu
“Jamu…
scinditi de li machini, ca mo’ a mu fatigamu!”
bello discurzu, non è vero?
Lu dicu sempe, ca mi piace assai
e nuju cca’ si offende, armeno spero…
Mi scialu mu cumandu, ca tantu cu mi sente?
e ncuna vota li custringiu cu la firma, cu atru nente
Iniziativa no’ nde pigghiu mai
ca li vote chi mi ncappau mu mi sentenu succediru sulu guai
Ordinai li fosse, l’acqua pe’ mu scula
e de machini no ssi nde sarvau una, ma una sula
mise lu primu truncu allu capannu
scifulai, e no’ cumbinai atru ca dannu
ordinai mu fannu vasci li barbacchiuni
e mu frijimu zzippuli simu tutti ndinocchiuni!
Nzomma…ccerte vote, mentre guardu l’operai, mi grattu lu vrazzu
e penzo: ”Ma cu’ è lu mandanti de li cazzati chi fazzu?”
Na jocatura
(arrede ogni joco jocatu nc’este na passione rande)
Ecco cca’, mo’ mi presento: eo su’ la sbijalora de la banda
e cu’ lli scherze chi eo cuminciu e poe atru rifinisce
tegno atu lu morali de cu è stupidu, de cui capisce
ca si nno’ sta fatiga certe vote ni pezzija
Eo organizzu ntra lu vosco li mangiati
quandu zzipuli, si nno pasta o arrustuti li patati
chi si li mangianu tutti, frijiuti o abbruschiati
Sempe sati, sempe risi
e pe’ quantu certe vote li scherze si li rendenu
e si li rendenu pisanti
riju, joco, e mi sbiju (ma de vogghia), alla facci de tanti e
tanti.
Nu
vacabundu
(ogni vacabundu ammuccia nu malignu)
Chi cazzu voliti mu vi dicu, ah?
Jativinde affanculu tutti quanti!
eo li parole li usu cu’lli guanti
Cangiai tutti li tri squatri, lu sapiti
ad una si fatigava (siti pacci???)
a n’atra mi canuscianu, chi voliti
allora pigghiai e tornai ja duve avia mangiatu
mu alliccu ‘ntra lu piattu duve prima avia sputatu
E chi mi nde futte: eo cca’ mi trovo bono: curriju li fimmeni e
li tocco
(ca li rande mi disseru accussì, pero’ no’ ssacciu mancu lu
pecchì!)
mi sbiju tutta la jornata e mi paganu lu stesso
tantu quandu vogghio , lu direttore lu fazzu fesso.
‘Nceste sulu unu chi no’ ssi fa mai li cazzi soe
e mi chiama sempe lavativu
nu mbranatu chi penza ca guadagnu
supa li spaji soe o de lu direttivu.
Criditimi ca ogni vota chi lu viju
pe’ quantu mi ncrisciu e sugnu sulu
fazzu finta ca scherzo e sempe riju…
E curriju li fimmeni addinovo
stavota però cu’ lli verme supa la pala
(pare ca sempe a mmu mi dinnu tuttu li rande:
eo lejo libbra de sesso, ma è curpa mia si mi fermai alla parola
“glande”?)
Na fimmena spogghiata
Arrivai a Camunni senza mancu mu mi nde accorgio
no mi scegghiu nuju, nuju mi cercau
mi mbuttaru ntra la prima squatra chi capitau.
No’ sacciu l’atri, ca no’ lli provai
ma sta squatra mi piaciu viatu
e mmo’ ancora de cchiù, ca m’ambientai:
mi scialu, staiu bbona, chi mi manca?
cu tanta gente chi mi vole bbene assai.
Sulu na cosa haiu pe’ mu dicu…
Lu nome meo si lu ricordanu sulamente
quandu a mmu accusanu a corcunu
o quandu facimu festa, chi a mmu mentimu nu poco l’unu
o ancora quandu, stanchi de tuttu lu lavoro de zzappa o
d’uncinetto
s’appojanu cu’ lla schina alli dinocchia mei o supa lu petto.
Ah, e puru n’atra vota, quandu nu cazzuni mi fice nu sgambetto.
Ma eo mi scialu, staiu bbona, chi mi manca?
Nu pacciu
(ogni paisi annoma l’omo cchiù sensibili “pacciu”)
Ammenzo a chiji ja no’mmi fidu pe’ mu staiu
e mi scialu assai pe’ mmu caminu
puru duve fine l’erva e ‘ncigna lu taju.
Haiu poco de dire, ma no’ pecchì no’ penzo
pecchì nuju vole mu mi sente.
E mi chiamanu pacciu
apposta ca dinnu ca parru sulu
e cu’ ll’atri no’ sacciu.
Nu scenziatu
Chiju chi no’ sapiti vi lu dicu eo!
Vi dicu como si mente lu traverzo o como si ‘mpasta lu cimento
como si fa l’aiola o como si scava controvento
como si fa la panca o como si iza lu muru, mattuma pe’ mattuma
prima dui, cu’ ammenzo poca caci
e poe de supa n’atra e poe ancora una.
Chi voliti mu vi fazzu, si eo nescivi genio!
La forza Deo mi la dunau tutta ‘ntra la testa
‘ntra li vrazza no: si mi duni la zzappa, ja ti resta!
E no, sporzare cu’ lli mani no’ mi pozzo
ca poe no’ ssù cchiù lucidu mu penzo
accussì mi tegno atu lu pitittu
e si corcunu sbaglia, sta’ tranquillu: eo nci l’avia dittu!
Na fimmena nova
Guardàti ca lu scangiamento chi eppe eo nuju lu sape
e nuju all’iniziu mi potìa
ca ere scunchiusa e sparrava puru senza mu volìa
Poe chianu, chianu arrivai fina alli mbrighi
ca cchiù de una volìa mu fa’ de cumandanti
e ti chiatava duve jivi, jivi
ammenzo all’arveri, arrede li pianti
Ma Deo voze ca certe viperi sbiolaru
e restau sulu genticeja bbona:
allora rihiatai
e m’accorgivi
ca de amici ncunu farzu lu perdivi
ma atri cchiù ‘mportanti nde trovai
Na coppia de zziti
Si nc’este na coppia novella de zzitichija coppia simu nui
furu assai ruffiani de Camunni li siti
e puru chiju chi attizzastivu tutti vui
Pe’ nui Camunni è sempe festa
chi si inchie de culuri e puru de sapuri
davero, simu sicuri
nu ricordo bello chi ni resta
Com’eremu conzati de l’iniziu allu lavoro
eremu tutti dui abbastanza crudi
ma ormai sentimu l’acejuzzi chi cantandu chiamanu lu suli!
Simu na coppia novella de zziti
e ni volimu veramente bbene
cu’llu penzero simu a nu jorno sulu
lu stacimu aspettandu, quandu vene vene.
L'omo chi si 'nzonna
Puru eo cuminciai ‘nzemia ad iji como ‘ntra nu sonno
ma poe all’improvvisu l’anima mia pigghiau lu volo, senza cchiù
ritorno
Quantu vote guardai li vrazza de l’atri
curare la terra cu zzappi ed aratri
ed eo sempe intra mu lejo li libbra
mu studiu, mu ‘mparu, mu divento cu’ sape?
E ‘ntantu sta terra ere sempe trattata
penzava puru ca li verduri nescianu suli
non sapìa ca d’arrede ere tantu sudata
cu acqua, fumere, caluri e doluri
Eppuru l’amuri pe’ si cose mi crisciu sulu
Dassai quaderne, libra e manii de grandezze puru
e mi scialai mu zzappu e mu ‘mpalu, ma puru senza attrezze
mi godivi stu taju, stu celo e milli atri bellezze
magari atri tanti mi nde scapparu
ma ca chissi mi li cogghivi e stipai ‘ntra l’anima è sicuru
no’ mi li pigghiaru certo li mbidii
e lu core meo restau ammenzo a si cose vivi
‘Ncumunciai puru eo ‘nzemia ad iji como ‘ntra nu sonno
ma poe l’anima mia pigghiau lu volo senza cchiù ritorno.
Chiju chi facìa tuttu
Ntra chiju vosco e ammenzo alli fìlici
l’atri vidianu sulu arrobba d’annettare
mbece eo mi ricordava de quand’ere zitejo
e mi facìa la capanna a castejo
Sentìa ‘ntra chija terra la terra mia
chi mi volìa tantu bbene, chi tantu bbene nci volìa
chija terra chi ere lu core meo, chi non ere atru ca mia
pe’ chissu la zzappava cu amuri, ca cu amuri mi rispundìa
Eo la Libertà la vitte ligata
ammenzo la mbidia, ‘ntra l’egoismu affucata
chiusa ‘ntra nu filu spinatu
de sorde, ‘nteresse e lavoro sporzatu
Eo la Libertà la vitte mu si rivigghia
ogni vota chi minài na zzappata o posài na mattuma
ogni vota chi abballài
ogni vota chi mangiamme, mbippemu e mi ‘mbriacai
E la gente no’llu sape ca eo campài de chissu a Camunni
tanti mi disseru “bravu”, atri “cazzùni”
eh, poveri cunni…
eo sulu sacciu cu si’ o terra e chi duni
Poe finìu, como tuttu finisce
finìu cu nna zzappa e nu ridìre duci
e ancora tanti ricorde, tanti
e nente, nente rimpianti. |
.jpg)